Ek well so gern ess wat Schönes siehn
Dinslaken · Dat es gar niet so einfach jetzonder, dat kann ek dej aber säggen. Dat hett, wemme kenn grote Ansprüche stellt, kamme jeden Dag wat Schönes siehn. Aber niet int Fernsiehn, nä, inne Natur. Dor es doch ömmer wat. Denn Frühling es dor. Die ässten Blümkes blöijen. Die Strück on ok die Böhm schlonnt üt. Et es ne wunder schöne Johrestidt.
Nä also, dat mein ek ok gar niet, wenn ek sägg, ek well wat Schönes siehn. Ek mein int Fernsiehn, owes, wenn Fierowend es, dann well ek gern wat Schönes siehn, mej so rechteg gemütlek op dat Sofa oder in denn Sessel sätten, denn Apparat ahnmaken, in ehnen van die völle Senders sall doch well wat senn, wat ehn Spass mäck, wor me sek so rechteg entspannen kann on ganz einfach sinne Freud häht.
Jo, Fleutekees! Vögge Dag wor dat wehr son Owend, wor bloß wat kom, wat mej niet intressieren. In ehn Programm wor son Kriegsfilm, in dat nächste ne Schau, wor me siehn koss, wie Eier ütgebröjt wonnen, me koss siehn, wie Steurverschwendong opgedeckt wött, dann ne Tragikkomödie üt Amerika, dann ne Sendong öwer dat Thema wenn Blagen selws Blagen kriggen, örges anders ne Krimiserie, dann Dokumentationen öwer dat Thema Honger on Doss, dann noch en Kriminalfilm, dann noch denn Titel Ganoven op de Autobahn, dann ne Abenteuer-Serie, die hieten der Gehängte on die Schlang!!! On dat alles ahn ehnen Owend, kasse dej dat vörstellen?
On nex, aber ok wörklek gar nex, wat mej interessieren oder wor ek hätt säggen können: Dat es doch nou wörklek ess wat Schönes. On wenn dou denks, et gäff doch ok jeden Owend Nachrichten, dann es dat well rechteg. Aber die send jo inne lässte Tidt sowat van schlemm gewonnen, bej dat, wat dor kömmt jeden Dag, es bloß Krigg on Onglöck on Zank on Stritt, märr ok nex Schönes. Ja nou, mott ek märr wijjer wachen on dörf die Hoffnong niet opgäwen, oder wie siehn ek dat? Et es jo gut, dat et ahn jede Fernsehgerät denn Knoop gäff, met denn me dat Deng ütmaken kann. Hämm ek dann ok gedohn. Aber dormet es dat Thema jo niet üt de Welt, dat ek gern ess wat Schönes siehn well. Wat sall ek dej säggen? Nou ässen ess rech!
Also, wat es de duhn? Wijjer wachen, de Hoffnong niet opgäwen. Pass märr ess op. Ehnes guijjen Dages kömmt bestemmt ok ess wehr wat Schönes. Dat es noch ömmer so gewäss. Wat ek bloß fassgestellt hämm: Et wött ömmer seltener. Villech lett dat jo ok dordrahn, dat ek ömmer ölder onn. Köss jo villech ok senn. Me wätt et niet. Ek well de Hoffnong märr niet op gäwen. Na ja.
KARL NEUKÖTHER (STELTEN KARL)
