Ömm betahlte Räcknongen unn "Ahn de Latte hauen" sallet nu johen. Dä ahl Passtuur Jiesen unn sinn Küster, dä Kaal Schmetz, wohren bi Iis unn deipem Schnee ahn de Kafucke jewässt unn hadden späowends noch dämm ahlen Söttenbach de "Lätzde Ölung" jedohen. Opp dämm Heemwäch, ett wohren twöntech Jraad kaalt, soren die Twee, datt bimm Wi'et Lui Meyer noch Lecht wohr. "Dä hätt noch oppen", sache dä Küster. "Jo", meinde dä Jiesen, "bi dä Hunkskölde enn Kloren, datt wöhr kinnem Doowen jeflött!"

"Nowend Lui, dauer ons flott twee Tellmanns Kloren. Vie häwwen iiskaale Quanten." Do flösterde dä Passtuur sinnem Küster ennet Ohr: "Eck hävv äwwer kinnen Pänning Jäld bi mi.""Eck äwwer ock nech, Härr Passtuur!" "Lui, Du moss ons ahn de Latte hauen", meinde dä Jiesen. "Matt nex, eck känn Enk jo. Eck sall woll ahnschriewen." "Opp ehnem Beehn kamme jo nech stohen", sache dä Passtuur. Dä Lui schudde noch ehnen utt. "Also, domett Du Bescheed weeß: Twee johen opp meck", sache dä Küster Schmetz. "Die angeren Twee sall sinne Hochwürden betahlen." Wie die Twee jejangen wohren, nohm dä Lui de Knitte unn schrevve opp: "Im Namen des Vaters: zwei Klare", unn dodrunger "In Ewichkeit Amen: auch zwei Klare" - unn madde veier Strecke.

Weil nu dä "Bäddelpasstuur" Jiesen förr sinn Marijenhospittal de Pänneker tesaamenbäddelde, hätt dachs dropp dä Lui Meyer "Im Namen des Vaters" dörchjestrecken. Dä Schmetz moch äwwer betahlen. Datt hödde hä ock jedohen. Dä Lui wohr enn Finnekicker, me kann ock särren enn "Flienich Fazzuun". Ehn Sprock sall vann ämm stammen: "Ett ess bätter, enn de Wi'etschaft ahn de Kerke te dänken, wie enn de Kerke ahn de Wi'etschaft."