| 00.00 Uhr

Heukeshowwer Platt
Emm Höhsipper Tunnel wu'ete jeknuutscht

Hückeswagen. hückeswagen Enn dänn Foffzejer unn Sässzejer Johren wohren Autos enn Heukeshowwen noch lang nech de Rärrel. Mehr wie de Hälfde vann dännen, die, sövve enns särren, nech bimm Päsche oder bimm Klengelnbärch brasseln jengen, mochen mo'ens freuh memm Zoch fott. Dä ierschde jeng emm halwer Fiff. Von Franz Mostert

Dä wohr förr de Freuhschecht enn de Bamach unn enn de BSI. Dä twedde nohm all die mett, die Rechtong Lütterkusen unn widder raff no Ritterschhusen unn Älwerfäld mochen. Hä fuhr emm halwer Säss. Emm halwer Sewwen noch enns wi'er. Emm halw Acht wu'ete dä Drosch Blaren kutschiert, dä opp datt Röntchen-Jümnasijum enn Lännäpp jengen oder angere Rechtong enn de Penne vamm Engelbätt vamm Bärch.

Nätt woret mols, wänn all die staatzen Verkööpersch-Wechter vamm Karstadt, vamm Koophoff, vamm Sinn oder vamm Meynen mett mochen. Dann jowet mols emm Höhsipper Tunnel jenau sonne Juchzerei, wie enn de Raupenbahn, wännet Verdäck runger jeng. Wohr dä Tunnel am Äng unn et wu'ete wi'er häll, dann soten se wi'er nätt manierlech do wie bimm Danz- unn Ahnstangs-Kursus. Ehnmol, eck weet datt noch wie hütt, do reip emm Tunnel datt Irmchen: "Nämm derek dinne Fenger do dänn! Nech Du... Du!"

Ett wohr ock die Titt, wo jederehner noch dänn Hänkelmann mett enn de Arbet nohm . De rechtejen Klandiesen fuhren mols mett. Dä Eujen vamm Ejerpohl sot alt emm Kupee unn hadde sinne Aktentäsche owwen emm Nätz lerren. Töscher Wenkterharen unn Born fenget ahn te dröppeln. Drunger sot dä Jüpp, dä an Hämmern ennjesterren wohr. Hä wohr ennjeschlopen. Wie hä enn Lännäpp uttsterren moch, soch hä utt wie dä "Mister Eerzensoppe". Datt Schäbbeje dobie wohr jo, datt seck all die angeren emm Kupee nex hadden märken lotten. Soja dämm Eujen vamm Ejerpohl wohret ejaal jewässt, datt hä meddachs nex mä emm Hänkelmann hadde. Dä Jüpp vann Hämmern ess nie wi'er ennet sälwe Kupee jesterren.

Ett wohren ock emmer enn paa "Rheinjold"-Sänger dobie. Ock ehner vann dä "Concordia" hengen vann de Brüch. Wie die dann nu de Klamotten hennjeschmetten hadden, do meinde dä Dittma vann de "Concordia": "Eck öwwerlerch mi, off eck nech ennen "Rheinjold" kumm. Do sachen die drei vamm "Rheinjod" wie utt ehnem Munk: "Dann trä vie utt!"

Kallent mi nech vann drüjen Eerpeln, de meesden Heukeshowwer künnen woll enns arrech knörwelech si'en. Je nö'er datt opp Wippfürth ahn jeht, ömm so mehr steijert seck datt. Äwwer, lovve ons allbeneehn dreimol ahn de Boscht kloppen. "Berjesche Deckköppe" send unn bliewen "Berjesche Deckköppe" mett ehner Reih Knööpe ahn de Juppe.

Quelle: RP
Diskussion
Ihre Meinung zum Thema ist gefragt

Schreiben Sie jetzt Ihre Meinung zu:

Heukeshowwer Platt: Emm Höhsipper Tunnel wu'ete jeknuutscht


Beachten Sie dabei bitte unsere Regeln für Leserkommentare.