"No, wie esset?" "Wie sallet si'en?" "Eck hävv Deck lang nech jekecken." "Mi woret ock nech dovann." "Unn nu?" "Datt süs De woll." "Watt matt eijentlech Enker Attuur?" "Oh Jott, dä ess doch alt twee Johr doot!" "Ett ess nech wohr! Kick'ße. Dorömm häww eck dänn alt so lang nech mä jekecken. Hä sall doch bloß nex Böses jehatt häwwen?"

"Unn ett Matta?" "Ätt hätt seck wi'er bekrärren." "Watt wohr dann am Jang?" "Weeß Du datt dann nech?" "Nä!" "Blenndarm, enn Wippfürth." "Woret tefri'en? Eck mein, dä Ehne sätt jo so, dä angere so." "Doch! Äwwer datt well eck Di särren: Wie dä Aazt datt Dengen enn de Hank hadde, do hadde hä förr de Opperazzijonssöster jesacht: Kicken Se enns hie, sowatt vann Blenndarm hävve enn Wippfürth noch nech jehatt.""Loddet Di jodd johen. Unn särr dämm Matta, mi hödde dä Dokter Böhner alt vörr sewwenzech Johren dänn Blenndarm ruttjehollt. Unn eck lävvde emmer noch."

"Wo wellze dann nu henn? Du dees jenau so, als höddze kinne Rauh emm Stätt." "Eck si drill. Minne Frau hätt meck jescheckt, säss spetze Brötcher hollen. Veier förr meck unn twee förr ätt." "Wo höllße die dann?" "Jodde Froch. Sall eck se nu bimm Pollem, bimm Beckmann, emm Koopmarkt vüüren am Äng, bimm Aldi oder bimm Koppelbärch hollen?""Wa noch enn Schlach, dann kannße se hengen emm neujen Hus bimm Steinbrink hollen." "Dann send se drüüch." "Eck jlöw, eck holl se owwen emm Islank, dann si eck flötter teheem."

"Ja Jung, mett Brötchern kamme ons enn Heukes-howwen baal dootschmitten. Äwwer wärren jedem Narel mosse memm Bus no Wippfürth." "Eck well Di watt särren: Dä Luhn hätt tee freuh taujematt! Wänne drei Schruwen brucktes, dann krärrße drei. Wänne hütt drei Schruwen brücks, dann mosse enn janz Paket mett dressech Stöck koopen. Sewwentwöntech lärren dann enn de Hötte römm."

"Oh. Datt hödde eck baal verjätten. Eck mott ock noch nomm Frisör." "Watt wellze dann do mett Dinnen drei Hörchern obbem Kopp?" "Wäschen, lärren, föhnen, Du Dämelack!"