Ett jödd Saaken, wodrahn me ruttkriejen kann, off ehner enn ächden Heukeshowwer ess, oder off hä alt lang jenoch hie wönnt, ömm die feinen Ungerscheede te explizieren. Nu trop eck'er ehnen, dä vertaalte mi, hä wöhr alt dressech Johr verhierott. Eck sache förr änn: "Enn Heukeshowwen hett datt: Eck si alt dressech Johr bestatt!" Anger Beispell: Taujetrockene, wänn se meinen, se künnten alt Heukeshowwer Platt, särren: "Am Sunndach spellt dä RSV 09." Heukeshowwer dojäjen: "Sunndach spellt dä Raspo."

Ehner, dä alt nerrenti'enhungertdressech enn dä ierschden Mannschaft vamm Raspo jespellt hadde, wohr dä Fretz. Hä ess nu alt enn paa Johr doot. Jott hävv änn selech! Wie hä Veirenachtzech wohr, trop eck änn opp dä Krüzzstrote. Hä wohr röstech unn wohr enn Heukeshowwen doförr bekannt, datt hä ett emmer alt fuustdeck henger dänn Ooren setten hadde. Eck sache: "Eck särr ock Dach Fretz! Wie esset?" Hä jrensde: "Jestern jenget noch." "Unn, watt matt die Jesondheit?" "Datt Uhrwärk löppt noch. Mett dämm Perpentickel do hapert ett watt."

Dann komve opp dänn Fußball te kallen. Datt wohr di Titt, wo dä Berti Vogts noch Bondesträner wohr. "Eck si noch fitt!", meinde dä Fretz. "Dösse Wäcke reip dä Berti ahn, off eck jähn Italien mettspellen künnte." "Unn?", eck sache. "Eck hävv jesacht, emm Storm datt trau eck mi nech mä tau. Äwwer enn de Verteidijong kannße meck märr reulech oppställen."

Enn rechtejen Heukeshowwer wohr ock dä Färdi. Hä wohr emm ATV. Bi dänn Kreis-Meesterschafden enn Rämsched hadde hä sinn Tornhemd, sinne Tornbuxe unn ock sinne Tornschauh teheem verjätten. Datt madde nex. Hä wu'ete enn Schleps unn Kraren unn emm Sunndachahnzoch Kreismeester emm Korrelstooten. Datt häwwen se mi opp alle Fäll vertaalt.