Op Oedingsch Papperlapapp
Krefeld · Os Jroos nannde mer Blage mar bloos Oma Papperlapapp, on dat wäejes dat: Ejal wat mer för os Jroos saite, so wesselde die emmer möt Papperlapapp. Dat hett sovöll als wie "red net sonne Stuß"! För en Beispill: Wemmer frogde: "Oma , hässe wat Leckeres", wesselde die bloos möt Papperlapapp. Also dat Wooerd jeht mech net uut de Kopp, on döcks drappier ech mech selws, dat ech et och sag, wenn jömmes domm Zeuch vertellt. Papperlapapp sett alles, mar et höed sech net böes aan.
Nau wollde mech Erika on Walter wat Joodes donn. Se hant mech on min Fräuke enjelaade, för em Vorster Kulturcafé Papperlapapp te frühstöcke. Wat ech teesch jedaiht hann, well ech för mech behalde: Papperlapapp? Wat soll dat wahl jäewe. Mar: Überraschung!
Nau jögde mer sonndes morjes all öm nüng Uhr via St-Tönis noe Vorst. Vorster sage Vorsch. Dat Eeschde, wat mech opfeel, wor dä mächtije Torel van de Vorster Kerk. En dä Torel kammer dä oedingsche Torel von Zinter Pitter verstecke. Dann soh ech vör en jroot Huus twee witte Fahne, wo dick dropstong: Papperlapapp. Dat Huus van Papperlapapp soll wahl ens enne rieke Buur jebaud hann of en besongere Vörschter Persönlechkeet. Öwer en solide Holttrepp kooeme mer en en Säälche, proppevoll möt Lütt, die all dat Papperlapapp-Gourmet-Frühstöck jenieße denge: En fürstlich Frühstöck, wat möt jeddem Buffet van de beste Hotels konkeriere köss. Lecker!!
An de Wangk van et Säälche honge bongke Jemälde jewess van enne niederrheinische Künstler. Dat jlöew ech, wäejes dat die fönf Cafétiers-Fräukes verspräeke: "Lernen Sie regionale Künstler vom Niederrhein kennen, genießen Sie gesellige Abende in entspannter Atmosphäre." Velleits dörw ech em Papperlapapp och ens min platte Vertellekes vörläse. Mundart-Vorlesung! Dat wör jett. KÖEB UUT OEDING
